إلهام شاهين: أدواري الجريئة محدش قدمها غيري ومفكرتش في الاعتزال (فيديو)
إلهام شاهين، قالت الفنانة إلهام شاهين: “قفلت نوعيات الأدوار وأنا حاولت خلال مسيرتي التنويع في الأدوار، مبقاش فيه جديد بدأ يجيلي أدوار مكررة وشبه أعمال شاركت فيها يبقى مينفعش أعملها لإني هكرر نفسي”.
حقيقة تفكير إلهام شاهين في الاعتزال
وأوضحت خلال لقائها ببرنامج “الراديو بيضحك” المذاع على الراديو 9090: “قلت لو مجاليش دور جديد أنا ممكن أبعد عن التمثيل وميهمنيش إني أقعد سنين في البيت بدون شغل، ومش باعلن اعتزال، لأني عمري ما فكرت في الاعتزال، ولكن أوقف لحد لما تجيلي حاجة مختلفة ومميزة”.
أدوار إلهام شاهين
وأضافت: “أدواري الأخيرة محدش قدمها غيري، مثل مريضة ألزهايمر محدش قدمه من النجمات وبطريقة بداية المرض وتطوره لحد لما الشخصية تموت، ومسلسل بطلوع الروح زعيمة داعش، والدور ده كان مفاجأة كبيرة ليا”.
أعمال إلهام شاهين
ولفتت إلهام شاهين: “أنا بتطرق للأدوار والأعمال اللي يمكن غيري من النجمات يخافوا منها، تبقى جريئة ومفيدة ولها رسالة”.
في وقت سابق، قالت الفنانة الهام شاهين: “حرب غزة اكتر حدث أثر فيا في 2023، موت الأطفال والهدم والخراب أمر مؤلم نشهده الآن في غزة، وشاهدنا هذه المشاهد في سوريا وليبيا واليمن، وحاليا في السودان وقبلهم في العراق”.
ظروف المنطقة العربية
وأضافت خلال مداخلة هاتفية ببرنامج “حضرة المواطن” الذي يقدمه الكاتب الصحفي سيد علي بقناة “الحدث اليوم”: “كل المنطقة العربية تمر بظروف صعبة، والحياة أصبحت مش هادئة ومفيهاش سلام منذ سنين، وهذا يؤثر نفسيا عندنا كلنا ومناظر الدمار والحروب بتجيبلنا اكتئاب”.
إثارة الجدل
وتابعت إلهام شاهين: “مفيش أي حدث لمصر إلا لما أشارك بقوة علي الأقل برأيي، أي حاجة تخص بلدي وعروبتي أو الوسط الفني، بيكون ليا رد فعل قوي ممكن يثير الجدل لإني مببقاش دبلوماسية”.
كارثة السوشيال ميديا
وواصلت: “أدافع بقوة عن أي حد يمس مصريتي وعروبتي والوسط الفني، والسوشيال ميديا جننت الناس والكل عايز يتكلم ويقول آراء، وأنا بشوفها إن مساوئها أكتر من مميزاتها”.
تراجع دور الفن
وعن رأيها في 2023 فنيا، لفتت: “الشغل قل كتير وإحنا مش في أجمل أوقاتنا الفنية وإعداد الأعمال قل والجودة محتاجة إننا نتعب عليها أكتر، وفيه مسارح مقفولة لازم تتفتح، ومحتاجين عدد سينمات أكتر في جميع محافظات وقرى مصر، محتاجين أشياء كتير”.
