ساحة الرأي

أبوالسعود محمد يكتب: بقرة الحكومة

أبوالسعود محمد يكتب: بقرة الحكومة

أبوالسعود محمد يكتب: بقرة الحكومة
عضو مجلس نقابة الصحفيين السابق
بقلم :أبوالسعود محمد

من فترة مزارع بسيط راح للاصلاح الزراعي بسوهاج يجيب بقرة بالتقسيط يربيها هو ابنه عشان ياكلوا عيش من تربيتها وممكن يشربوا شوية لبن منها ويعيشوا زي خلق الله.
الاصلاح الزراعي عطاهم بقرة عن طريق مشروع الاتحاد الأوروبي وخلاهم يدفعوا ألف جنيه لشركة قناة السويس للتأمين عشان يأمنوا عليها.
المزارع دا دفع فلوس التأمين وخد الوثيقة وروح البيت بالبقرة لقيهم عطولوا بقرة مريضة، قعد كل شوية يكشف عليها ويدفعلها فلوس علاج وتربية ٦ شهور، ولما مالقيش فايدة رجع للبهوات بتوع الاصلاح يقولهم يا بهوات الحقوني تعالوا شوفوا البقرة بتاعتكم.
البهوات بتوع الاصلاح جابوا طبيب بيطري، فقالهم البقرة دا فعلا مريضة لا تصلح للتربية ،ولازم تتباع او تدبح، فبعوها في مزاد علني ،والمزارع خسر فلوسه وشكرا، طبعا لا هيقدر يرد الفلوس اللي صرفها ولا حاجة…لم نفسه بخيبة حظة وسكت.
تلف الايام وتدور الأيام وبعد ما الراجل اتوفي إلي رحمة الله تعالى ،بتوع الاصلاح الزراعي يروحوا يطالبوا ابنه بفلوس البقرة وفوايد التقسيط وكمان غرامات تأخير الأقساط !!!!
– طيب ليه ياحكومة ؟!
يقولك لأن شركة التأمين اللي هي حكومة برضو مش عايزة تدفع وثيقة التأمين علي البقرة
– طيب وأنا المواطن اللي صرفت فلوس وماخدتش حاجة مالي بقى؟
يقولك ما أنت خدتها ليه وهي مريضة ؟!
طيب هو أنا دكتور بيطري ياحكومة ؟
– وماجبتش دكتور ليه يا مواطن؟
– هو أنتم مش المفترض بتعملوا شغلكم صح ودا كمان عن طريق الاتحاد الأوربي، وعندكم دكاترة كاشفة علي كل البقر بتاعكم ياحكومة؟
– برضو مالناش دعوة يامواطن ؟
– طيب وشركة التأمين ما جبتش دكتور ليه قبل ما تعمل الوثيقة يا حكومة؟
– برضو مالناش دعوة يامواطن ياغلس هتدفع يعني هتدفع وعملنالك حجز بـ١٨ الف جنيه في النيابة وهنحبسك ،وماحدش هيقدر يحاسبنا يامواطن
للعلم هذه شكوى علي مكتب وزير الزراعة من فترة دون رد
فاللي يعرف ازاي مواطن غلبان يوصل لشكاوى مجلس الوزراء يقولنا..لأني لا أظن أن الإصلاح الزراعي بسوهاج سينهي الموضوع خاصة بعد تقديم حجز جديد للنيابة العامة ضد الرجل ب ١٥ ألف جنيه .

مقالات ذات صلة

زر الذهاب إلى الأعلى
error: Content is protected !!